НЕ АЭС! ТАК энергетычнай бяспецы. Чарнобыльскі шлях-2014

Прыходзь а 16 гадзіне на пляцоўку каля кінатэатра “Кастрычнік” (Мінск) 26 красавіка 2014 года і вазьмі ўдзел у Чарнобыльскім шляху, а затым з 17.30 да 18.30 у мітынгу ў парку Дружбы народаў, якія пройдуць пад лозунгамі:

Мы за бяз’ядзерны свет! Мы за ўстойлівую і бяспечную энергетыку! Мы за энергетычную незалежнасць! Не АЭС! Не вайне!

Ядзерная пагроза сёння набывае рэальныя абрысы — гэтая пагроза cыходзіць з імпэрскіх амбіцый Расіі, якая засяроджвае да межаў з Украінай вайсковыя фармаванні,  змясціла на тэрыторыі Беларусі свае ваенныя аб’екты і авіяцыю, здольную несці на борце тактычную ядзерную зброю. Гэта пагроза чарговай экалагічнай катастрофы з прычыны магчымай аварыі на АЭС, якую ў Беларусі пачалі будаваць па эксперыментальнай расійскай тэхналогіі, да з’яўлення праекта і яго экспертызы, паскоранымі тэмпамі, з парушэннем законаў. Гэта пагроза Чарнобыля, які працягвае забіваць беларусаў і гэтаму актыўна спрыяюць улады краіны, замоўчваючы рэальныя наступствы аварыі, асвойваючы забруджаныя землі і вяртаючы туды жыхароў.

Усе гэтыя складнікі — пагроза вайны, рызыкі Астравецкай АЭС,  Чарнобыльская катастрофа і яе сённяшнія наступствы, аб’яднаны расійскім імперыялізмам, дыктатурай у Расіі і Беларусі, якаяе абясцэньвае жыццё, здароўе і бяспеку людзей.

Мы, грамадзяне Беларусі, не хочам быць закладнікамі амбіцый дыктатараў! Мы не дазволім свой край, краіну і Планету зрабіць новым Чарнобылем! Мы выходзім 26 красавіка на Чарнобыльскі шлях, каб запатрабаваць: спыніць будаўніцтва АЭС і распрацаваць стратэгію бяз’ядзернага развіцця Беларусі, вывесці з Беларусі расійскія ваенныя аб’екты і фарміраванні, абараніць беларусаў ад наступстваў Чарнобыля, правесці ў краіне дэмакратычныя рэформы, без якіх немагчыма выкананне ўсіх папярэдніх патрабаванняў.

Не атамнай пагрозе! Не дамо свой край, краіну, Планету зрабіць новым Чарнобылем!

Нацыянальная платформа Форума грамадзянскай супольнасці Ўсходняга Партнёрства