Аб салідарнасці з народам Украіны

Зварот Беларускай нацыянальнай платформы ФГС УП
У гэтыя дні, напоўненыя і горам, і радасцю, калі Украіна перажывае пераломныя моманты сваёй найноўшай гісторыі, мы звяртаемся да ўсяго ўкраінскага народу са словамі салідарнасці і надзеі.

Разам з Украінай мы смуткуем па яе ахвярах, па героях, якія аддалі свае жыцці за агульначалавечыя каштоўнасці — свабоду, дэмакратыю, гуманізм і справядлівасць! Мы будзем памятаць пра іх.

Жыццё і здароўе людзей — гэта вельмі высокі кошт, які ўкраінскі народ заплаціў за сваю свабоду ад бязмежжа і бескантрольнасці улады. Гэтай крыві магло б не быць, але яна праліта не дарма. Няхай яна паслужыць урокам для тых, хто ўсё яшчэ лічыць, што такой цаной можна ўтрымацца ва ўладзе, што жыццё людзей можна аддаваць за прадметы раскошы і асабістыя амбіцыі.

Мы захапляемся гераізмам простых украінскіх грамадзян, іх пачуццём абавязку і адказнасці, самаарганізацыяй, самаадданасцю і воляй да перамогі. Без іх, звычайных мірных людзей, не адбылося б пераменаў.

Наперадзе Украіну чакаюць нялёгкія месяцы ўладкавання краіны, вяртання да нармальнага жыцця, фармавання новых адносін паміж дзяржавай і грамадзянінам. Мы верым у тое, што наш добры сусед — народ Украіны — зможа выбудаваць сваю новую дзяржаву як сябра вялікай агульнаеўрапейскай сям’і, заснаванай на ідэалах гуманізму, на прынцыпах дэмакратыі. Украінскі народ заслужыў права будаваць гэту дзяржаву сам, і тады карупцыі, злачыннасці, бяспраўю і прыгнёту людзей там не будзе месца.

Слава Украіне!

Беларускія арганізацыі грамадзянскай супольнасці, удзельнікі Беларускай нацыянальнай платформы Форуму грамадзянскай супольнасці Усходняга партнёрства (больш за 60 арганізацый).

Нацыянальная платформа Форума грамадзянскай супольнасці Ўсходняга Партнёрства