Беларуская асацыяцыя журналістаў БАЖ заклікае людзей свету падтрымаць Марафон салідарнасці са зняволенымі беларускімі журналістамі!
Зараз у Беларусі за кратамі знаходзіцца 31 медыясупрпацоўнік. Гэта таленавітыя журналісты, зняволеныя за сваю прафесійную дзейнасць — асвятленне падзеяў і выражэнне грамадзянскай пазіцыі.
Незалежныя беларускія журналісты заклікаюць сваіх калег з іншых краінаў, неабыякавых людзей і грамадскія арганізацыі нагадваць сваім урадам, грамадскасці і медыям пра жорсткія парушэнні правоў на свабоду СМІ, выражэнне меркаванняў і свабоду слова ў Беларусі.
“Мы хочам, каб у свеце, дзе адбываецца столькі падзеяў, людзі памяталі і пра беларускіх журналістаў за кратамі, — кажа старшыня БАЖ Андрэй Бастунец. — Мы хочам, каб свет бачыў не проста лічбы, а жывых людзей, якія зараз пакутуюць у турмах за свою прафесійную дзейнасць. Дзеля гэтага мы сабралі партрэты зняволеных беларускіх журналістаў, на якіх бачны іх твары і тэрмін зняволення . Мы заклікаем фатаграфавацца з патрэтамі і выкладаць фота ў медыя прастору вашых краін.
Ініцыятыву ўжо падтрымалі “Еўрапейская федэрацыя журналістаў”, “Рэпарцёры без межаў” і іншыя журналісткія арганізацыі. Але мы хочам выйсці за прафесійнае кола, каб больш людзей даведаліся, што адбываецца ў Беларусі”.
ЯК ДАЛУЧЫЦЦА ДА КАМПАНІІ
Раздрукаваць ПАРТРЭТЫ зняволеных калег, сфатаграфавацца з імі ў пазнавальных месцах вашага горада (не ў Беларусі) і апублікаваць у сацыяльных сетках з тэгамі #СвабодуЖурналістам і #BecauseTheJournalist, а таксама даслаць нам на адрас office@baj.media ці intercomm@baj.media
Марафон салідарнасці стартаваў у Вільнюсе (Літва) 3 траўня. Тады 33 журналіста выйшлі ў цэнтр горада з партрэтамі 33 зняволеных калег.
На дадзены момант кампанію падтрымалі ў 25 краінах свету, на ўсіх кантынентах. Марафон працягнецца да таго часу, пакуль усе зняволеныя журналісты не выйдуць на свабоду.
#СвабодуЖурналістам
#BecauseTheJournalist
#StandWithBelarus
